Bugungi globallashuv davrining eng tahlikali illatlaridan biri bu – korrupsiya. Bu illat domiga tushganlar g‘arazli maqsadlari yo‘lida mansabini suiiste’mol qilib, faqat va faqat boylik orttirishni o‘ylaydi xolos. Bu yo‘lda iymonni, or-nomus, diyonatni unutadi.

Chindan ham, korrupsiya – jamiyat uchun jiddiy xavf bo‘lib, deyarli barcha sohada uchraydi. Uni bartaraf etish uchun esa insonlarning huquqiy dunyoqarashini oshirish, bu kabi jinoyatlarga jazo muqarrarligini tushuntirish, eng asosiysi, adolat barqarorligiga ishontirish lozim.

Namangan viloyati arxiv ishi hududiy boshqarmasi hamda viloyat prokuraturasi bilan hamkorlikda o‘tkazilgan “Biz korrupsiyaga “Yo‘q!” deymiz” mavzuidagi davra suhbatida shu haqda gap bordi.

Dastlab boshqarma boshlig‘i Nurali Ahmadaliev so‘z olib, yurtimizda amalga oshirilayotgan keng ko‘lamdagi islohotlar, tizimdagi ijobiy o‘zgarishlarga to‘xtaldi. Shuningdek, mavzu doirasidagi o‘z fikr-mulohazalarini ham bildirib o‘tdi.

Shundan so‘ng Namangan viloyati prokuraturasi bo‘lim prokurori Akramjon Karimov bugun jamiyatimiz taraqqiyoti kushandasi hisoblanmish korrupsiyaning ayanchli oqibatlariga to‘xtalarkan, yurtimizda huquqni muhofaza qiluvchi idoralar tomonidan unga qarshi kurash olib borilayotgani, mazkur sohadagi ishlar ko‘lamini hayotiy, prokuratura tizimidagi tergov materiallari misolida tushuntirib o‘tdi. Shu bilan birga, qonunchilikda korrupsiya bilan bog‘liq jinoyatlarga belgilangan jazo choralari haqida ham to‘xtaldi. U o‘z ma’ruzasi davomida bu illatga qarshi kurashish nafaqat huquqiy organlarning, barcha keng jamoatchilikning ham burchi ekanini ta’kidladi.

Suhbat yakunida Namangan viloyat arxiv ishi boshqarmasi tizimidagi davlat arxivlari rahbarlari hamda xodimlari mavzu yuzasidan o‘zlarini qiziqtirgan savollarga batafsil javoblar oldilar.

Namangan viloyati arxiv ishi hududiy boshqarmasi matbuot xizmati